चषक जिंकल्यावर “कॅप्टन कुल” धोनी अचानक कुठे गायब व्हायचा? कौतुकास्पद उत्तर

इनमराठी टीम

3 years ago

आमचे सर्व लेख मिळवण्यासाठी फॉलो करा : फेसबुक | ट्विटर | इंस्टाग्राम | टेलिग्राम । शेअरचॅट

–

व्हिडिओजसाठी फॉलो करा : इनमराठी युट्यूब चॅनल

===

आपल्या संयमी आणि परिपक्व नेतृत्वाने भारतीय क्रिकेटला सर्वोच्च स्थानी नेऊन ठेवणारा खेळाडू म्हणजे भारताचा माजी कर्णधार, आपला “कॅप्टन कुल” महेंद्रसिंग धोनी. क्रिकेटच्या तिन्ही फॉरमॅटमध्ये भारताचे नेतृत्व करताना त्याने अनेक आदर्श, अनेक वस्तुपाठ घालून दिले.

नुकतीच त्याने त्याची निवृत्ती जाहीर केली. आणि त्याच्या सगळ्या फॅन्सना खूप गहिवरून आलं. एकतर लॉकडाऊन आणि कोरोना काळात धोनीचा खेळ कुणालाच बघता आला नाही.

आयपीएल सुद्धा लांबणीवर पडली आणि अशातच धोनीने निवृत्ती जाहीर केल्यानंतर कित्येक क्रिकेटप्रेमींनी क्रिकेट बघायचेच नाही असे ठरवले.

स्वतःच्या हिंमतीवर त्याने आपल्या देशाला आज इतक्या उंचीवर नेऊन ठेवले आणि विश्वचषक जिंकून देऊन कित्येक भारतीयांचे स्वप्न पूर्ण केले.

त्याच्या कित्येक गोष्टी नवोदित खेळाडूंना शिकण्यासारख्या आहेत. फिटनेस, सातत्य, संघभावना, नम्रता आणि अजूनही बरंच काही..

पण धोनीचा त्याच्या चाहत्यांना सर्वात जास्त भावलेला गुण म्हणजे त्याची खेळाप्रती असलेली निष्ठा.

जिंकल्यानंतरच्या देखाव्यापेक्षा खेळतानाच्या कामगिरीवर त्याचे असलेले सच्चे प्रेम! याच गुणामुळे त्याचे कर्तृत्व इतर देशांच्या कर्णधारांपेक्षा उठून दिसते.

धोनीच्या विशिष्ट नेतृत्वगुणांबद्दल बोलले जाते की धोनी बाकी खेळाडूंच्या अंगी असलेली उत्कृष्ट कामगिरी त्यांच्या कडून करवून घेतो.

या मुलाखतीत धोनीने मान्य केले की त्याच्यासाठी काही खेळाडूंचा अहंकार वा स्वाभिमान न दुखवता त्यांच्यातील साध्या गोष्टींचा विकास करणे सर्वात जास्ती आव्हानात्मक होते.

क्रिकेट मध्ये कॉमन सेन्स?

धोनी म्हणतो,

“कर्णधार असताना माझ्यासाठी सगळ्यात मोठी शिकवण ही होती की, मी विचार करायचो की हा तर कॉमन सेन्स आहे, ही तर अत्यन्त साधी गोष्ट आहे. पण कॉमन सेन्स अशी काहीच गोष्ट नसते. तुम्ही असाच विचार करता की ‘अरे, मी हे बोलायला पाहिजे होतं, सांगितलं पाहिजे होतं’.

–

मला नेहमी जाणवतं की मी कर्णधारपदी असताना सगळ्यात मोठी समस्या काय असेल तर, तुम्ही समजा कर्णधार असाल, मी तुमच्याजवळ येऊन बोलतो, ‘मी मॅच नाही खेळत, तुम्हाला काय वाटतं मी का खेळत नसेल. मी तुम्हाला प्रश्न विचारतोय, पण मला उत्तर अपेक्षित नाही’

या संभाषणात त्याने आणखी एक कौतुकास्पद गोष्ट बोलून दाखवली. पत्रकारांनी त्याला विचारले की,

‘तू येतोस आणि चषक स्वीकारून तिथून गुपचूप कुठेतरी निघून जातोस, हा एक पायंडा पडत चाललाय.. एक ट्रेंड झाला आहे. असं का?

तेव्हा तो सहजपणे म्हटला,

“तुम्हाला असे वाटत नाही का, की हे बरोबर नाही, सामना तर पूर्ण संघ जिंकतो पण चषक घेण्यास मात्र फक्त कर्णधारच जातो?”

–

“हे एक प्रकारचे अतिप्रदर्शन आहे, आपण आधीच १५ सेकंदांचा प्रदर्शनाचा भाग असता, मला नाही वाटत तिथे तुमची काही गरज असते. आपण सर्वांनाच जिंकल्याचा उत्सव साजरा करायला आवडते, तुम्ही त्याचा भाग असता, तुम्ही पूर्ण वेळ चषकासोबतच असले पाहिजे असे नाही.

त्यामुळेच मी म्हणतो की शक्य तितका या गोष्टीला सरळ सोपे करायचा प्रयत्न करूया.”

दोनचार ट्रॉफीज जिंकून आपण खूप मोठे असल्याच्या अविर्भावात वागणारे कित्येक खेळाडू आपण पाहिले. क्रिकेटच्या क्षितिजावर असे अनेकजण येतात. तेवढ्यापुरते मैदान गाजवतात, आणि पार्ट्याही!

पण धोनीसारखे क्रिकेटमध्ये आल्यानंतर फक्त क्रिकेट खेळण्याला महत्व देणारे खेळाडू दीर्घकाळ खेळतात.. क्रिकेटरसिकांच्या मनात घर करून राहतात. त्यांचे स्थान आढळ असते ते त्या खेळाप्रती असलेल्या निष्ठेमुळे.

त्यामुळे धोनीने भले खेळातून निवृत्ती घेतली असेल, पण त्याच्या ह्या गुणांमुळे तो त्याच्या चाहत्यांच्या मनातून कधीच निवृत्त होणार नाही!

—

आमचं युट्यूब चॅनल आणि त्यावरचे व्हिडिओज बघण्यासाठी चॅनलला फॉलो करा :

–